Exchange Blog Project

halo alli zämä!!!

August 13th, 2006 | Geschrieben von Luisa.

Bin jetzt grad in Norwege und gnüss en wolkige sunntig…! Aso so is ussland id schuel zgo isch voll de hammer!!! am afang hani gmeint das es schwirig sii wird mit de neue kultur, ennere neue sproch und alles drum und dra…aber s’isch würlki sehr lustig und interessant all die neue sache kennezlerne! Me mues sich halt eifach echli iläbä und offe si für neui erfahrige…
Woni in Bergen acho bin, bini recht igschüchteret gsi: so en unbekannte flughafe, ich cha niemer verstoh, alles uf norwegisch agschribe… aber sobald i de rescht vode gruppe gfunde ha, isch es luschtig und interessant worde! alli hend echli vo sich verzellt, wie de flug gsi isch und was au immer… ich glaub das wenn all öppe ide glich situation sind (wie bi üs ebä grad, alli ellei acho und igschüchteret), denn fot me a mitenand zredä und me isch vil offner für neui fründschafte und bekanntschafte…
Aso, Norwege….isch halt scho riiiiiisig!!! die sägät zum bispil “me gönd uf es chlises türli, me münd churz mit em bus fahre…”: echli isch für die so 1 bis 2 stund!!! da hett mi den schono gshockt, aber langsam hanimi dragwönt… ;)
Es lont sich würkli Norwege kennezlerne, wenn mer dnatur liebt und gern ade luft isch…alles isch halt eifach grüen, hellgrüen!
ok, gnüsset eure sunntig ide schwiiz, und vorallem gnüsset euri guet schoggi!! die werdet er sicher vermisse (wen er si gern hend, wi ich) :P

3 Kommentare

  1. Geschrieben von: Ürsu, August 13th, 2006 15:05
    Ürsu

    kuhl! das isch der erscht idraag vo usserhaub vor schwiiz! ;)
    du bisch die ganz links ufem fotti, oder?
    auso bi üüs schiffets! und zwar rächt. aber s isch au lang schön gsii… :P
    in indie wirds sicher au no grüen sii wenn i aachume und nächer dür trocheziit immer wie bruuner! cha der räge auso no es letschtsmou gniesse :D


    i mues mini schoggi gloub in form vo ovi mitnää denn cha ni se mer aarüere, will si süsch wür verlaufe!

  2. Geschrieben von: sime, August 13th, 2006 15:36

    wow, nid schlächt…die erschti Person ‘däne’;-) Jo, i hoffe, es isch de in Spanie wider chli chüeler weni de goh…aber Septämber isch jo nümm grad so der Hochsummer..
    Nowrwege mues mega toll si..! Mi Unggle wohnt dörte, hetsech jetz mit sinere Frou es Hüsli gchoufft..und d Fotine vo dört si eifach wunderschön! Nur bini nonie dörte gsi…obwouer scho sit sicher 20 oder meh Johr dört wohnt:-S

    Schoggi….muesi de auno mitnäh! Aber mit Marzipanfüuig:-D

  3. Geschrieben von: Schnetz, August 14th, 2006 10:32

    hei
    könne de zwar ned aber e wönsche der ganz vel glöck in norwege wenn besch de acho? und wie lang blibsch? isch das dört au so das es e ziit get wo d sunnne nie untergeit oder rsp.nie vörechunnt?
    glg schnetz

Kommentieren

(zuerst einloggen wenn du ein Mitglied bist!)