Exchange Blog Project

Anic Bombestemmig!!!

Dezember 17th, 2006 | Geschrieben von Anic.

Letschte Zischtig hei mer ir Schuel e Bomb threat gha!
(Bombedrohig!)
Zersch hei (wedermou) d Fuersirene ghornet, was inzwoesche niemerem meh Idrock macht, aber wo d Lehrer ploetzlech wie hysterisch im Zuegs omegschroue hei (s esch ir Pouse gsi) hei mer ues denn haut doch zom Gebaeude useghievt. Dommerwis esches oeppe 
-18 Grad gsi ond natuerlech hei mer ke Zit gha, vorhaer usm Locker go die warm Jagge ond de Schal z hole! (Es paar Genies hei nedemou Schue agha ond hei barfuess im Schnee omegjommeret.) Normalerwis, wenn d Schuel Fueralaerm probet, choei mer nach ca. 2 min weder ine. Aber dasmou hei sis ues ongwohnt wit waeg vor Schuel uf d Parkplaetz gwese, wo sech nach oeppe 20 min moenschlechi Iiszaepfe boeudet hei.
Schliesslech sisi denn aendlech uf d Idee cho, dass mer jo eigentlech zor meh oder weniger waermere Iisbahn choennte goh…

Nach langem hin ond haer doerte, esch denn ergendeinisch d Nachrecht doregseckeret, dass mer e Bombedrohig becho hei. (Mer si chli entuescht gsi, woeu wenn d Schuel haet afo broenne, haette mer wenigschtens es warms Fuerli gha…).

Denn, aendlech, esch der Alarm ufghobe worde, ond mer hei met ruhigem Gwoesse (ond chaute Fuess) weder id Schuel zrogg choenne.

Wie sechs denn schlossaendlech usegschtoeut hed, esch der Alarm vomene 14-joehrige Meidli cho, wo ehres Essay ned zor rechtige Zit hed choenne abgaeh. (Hejo, e Bombealarm esch wenigschtens mou e ifausricheri Usred aus “mi Hond hed d Husufgabe gfraesse!!!”…)

Emmerhen hei mer “Bombestemmig” gha! ;-)

4 Kommentare

  1. Geschrieben von: mam, Dezember 17th, 2006 22:21

    haaaaaaaaarrrrrrrrrrch anic !!!!

    dini neuschti erzählig treit ned grad zunere grosse beruhig bi, obergrummel !!

    zum glück bisch du scho älter als 14i, so hesch immer alli dini essays gmacht und muesch gaaaar nie sone komischi drohig useloh….. ;-)

    jo, bi dir isches längwilig wie immer…….

    kaltgrusligi ( + / grad ) grüesslis

    mam

  2. Geschrieben von: Martina, Dezember 18th, 2006 10:43

    Boah….hammer… ;o)
    Dasch öbe s Gliiche wied Bombestimmig wo eg und d Mim gha hei in London ;o)
    You know? :o )

    also häbs no schön

    martina

  3. Geschrieben von: vane, Dezember 18th, 2006 11:30

    hey anic,

    du häsch Rohr grad i angst u schrecke versetzt. hoffe das isch e eimaligi usnahm gsi. zum glück ischs nöt ärnsters gsi (wott do gar net lang überlege was aus hät chönne passiere), haupsach es isch nüt passiert. u i gseh in kanada wirds eim net langwilig.

    liebi grüess usem chaute, verbaute chline rohr.

  4. Geschrieben von: vane, Dezember 27th, 2006 11:44

    hey anic,

    i hoffe häsch ganz schöni fästtäg ka. mir hei schön gfiret (leider häts ke wiessi gä). mir cha jo net aues ha. und de silväster, das chani scho verusgseh, wird todlangwilig (i glaub du weisch scho werum). tja mou luege villicht wirds doch no besser als i dänk. auso i hoffe dir geiths guet u das de guet u sanft is noiä johr übererütschisch.

    lg usem aargau

Kommentieren

(zuerst einloggen wenn du ein Mitglied bist!)