Exchange Blog Project

Anic B.C trip

January 30th, 2007 | Geschrieben von Anic.

Do in Canada setze d Luet maengisch eifach ine truck ond fahre… ond fahre… ond fahre!

So chonnts, dass mini reisebegeischterete Gaschtoeutere vor chorzem der Meinig gsi si, me ond mini Froendin Marion ufne Trip quer dor British Columbia met z naeh. (E muess allerdengs erwaehne, dass das ned nor met ehrere Reiseloscht z due hed, schliesslech moei ou se wie jede astaendig Boerger schaffe.) Mer hei dae trip aber metemene wechtige Langloufroenne vo mine Gaschtgschwoeschteti verbonde, ond, was no voeu wechtiger esch, mer si mini Gaschtschwoeschter Jane in Vancouver am Floghafe go abhole. Si het ehri letschte 5 Moenet in Spanie (Valencia) im Ustusch verbrocht.
Jedefaus si mer auso am Fritig am Morge am 5-i lostuckeret, was foer sone Morgemoffu wie me e zemlechi Leischtig esch. Mer hei nome scho 4 Stond brucht, zom i die noechschti Grossstadt (Prince George) z cho, wo ufenere Charte voeu z noech erschint!
Jedefaus si mer nach etleche Stonde fahrt (oeppe 8!) aendlech am erschte Ziu acho: In 100 Mile House. (Dasch e Ortschaft).
Nach 2 Taeg Langloufroenne, abgfrohrne Zeche ond Nasespetz ond etleche Kafi spoeter (E bi Tee- ond Kafi-Schloerfer worde!), hei mer d Chend doert zroggloh ond si ellei, z vierte-hoech witer gfahre.
British Columbia esch landschaflich scho e extrem vellsitigi Provinz! Mer si usen Baerglend anere art Wueschti verbigfahre, met vellne Farme, emene Canyon ond kilometer lange Zoeg. Dasch so rechtig s Cowboyland gsi!!
Witer onde im Suede esches oeppe 20 Grad waermer, es het tatsaechlech gruens Gras (wenn sitem Oktober nomeno Schnee gseh hesch, esch das es diraekts Wonder!) ond eifach Fruehlig pur!!!
Ergendeinisch, si mer denn aendlech ir Metropole Vancouver acho. Doert hei mer e Nacht im groeschte, luxurioesischte ond eifach atemberoubendschte Hus verbrocht, woni je denne gsi bi! Es het de Tante ond Onkel vo mire Gaschtmuetter ghoerti. Aber trotz ehrere guete Altersvorsorg si si extrem gaerdet, froendlech, haerzlech,…!!! Ond der Onkel hed e M&M’s Figure Sammlig. :-)

So esch uese Trip auso langsam am Aendi zuegange. Nachdaem mer d’ Jane am Floghafe ondere Arm packt hei, hei mer ues ufe lang, 14-stoendig Heiwaeg gmacht.

Total si mer oeppe foer 45 h gfahre, ond das si nome Fahrzite.

Aber ebe in Kanada macht me das haut so, ond trotz de vellne Kilometer wo mer hender ues brocht hei, hei mer d Provinz ned es einzigs mou verlo!!!…

4 Kommentare

  1. Geschrieben von: Ürsu, January 31st, 2007 10:11
    Ürsu

    mini oeutere sind in prince charles duerecho, wo si duer kanada greist sind! hehe :)
    wenn geit der schnee eigentlech waeg? gitz doert ke fruelig? a wart, s isch jo no eigentleche winter, das hani ganz vergaesse =)

  2. Geschrieben von: vane, January 31st, 2007 22:04

    hey anic, ha scho dänkt dass de verlore gange bisch. bi froh das de sone wunderschöni ziet häsch. bi mir lauft au aues guet. wür säge wie immer. i glaube es wäre vieu froh wo ihr schwiz si, wenn sie schnee chönnte ha. i hingäge bi froh wenns wieder über 5 grad wird. muesch der vorstöue dass bi nueu grad dusse muesch schaffe. isch chli müesam aber trotzäm gfauts mer no. mir isch zum glück net immer dusse.

    schöns grüessli usem aargau

  3. Geschrieben von: mam, February 3rd, 2007 23:45

    hey tochter

    e ha der jo scho aadroht:

    sobald du zrogg besch, (e hoffe no im johr 2007 :-) )

    muesch di ad autoprüefig mache.
    so chöi mir au dur ganz europa gondele, ohni dass dini armi mum alles sälber muess fahre….

    weisch, du wersch do scho langsam aber secher vermisst…. :-?

    nämli, jo e

    schneelosi schwyzerchäs&schoggi (njamnjam)-grüessli

  4. Geschrieben von: Anic, February 4th, 2007 21:12
    Anic

    E gloub mer waerde no e lange Wenter ha. Im Fruehlig esch denn aues zemlech vermatscht. auso nuet vo schoene Bluemli wo usem Bode spriesse.

    Am 2. februar hei si do aber “Groundhog-day”:

    Das esch so nes Tier wo chli usgseht wie es Murmeltier ond onter der Aerde laebt. Me seit, wenn das groundhog us der Aerde chonnt ond si Schatte gseht, heisst das, dass der Wenter ome esch. Wenns der Schatte aber ned gseht (offesechtlech woeus ke Sonne het) hei mer no 6 Woche Wenter.

    Wenn e das groundhog waer, woerd i gloub no e laaange Wenter prophezeie. Es schneit scho weder…

    :-) ;-) :-)

Kommentieren

(zuerst einloggen wenn du ein Mitglied bist!)